"Boas Noite, Ferrol", un volume no que se ofrece un orixinal retrato da cidade a través dun percorrido fotográfico pola súa fisionomía nocturna que permite ao lector descubrir esa outra perspectiva da urbe que só a noite é quen de ofrecer.

A través de case un cento de instantáneas editadas en gran formato e asinadas polo fotógrafo Ramón Vaamonde, "Boas Noites, Ferrol" percorre o rueiro local para convidar ao lector a mergullarse non só no rico patrimonio da cidade senón tamén na súa propia historia. Así, a obra emprega a luz da noite para captar a esencia dalgúns dos espazos ferroláns máis emblemáticos pero tamén a de aqueles máis novos sobre os que a localidade segue a construír o seu futuro.

Os que se achegan á publicación vólvense, por tanto, cómplices do diálogo permanente entre as distintas arquitecturas que integran a cidade departamental, da que emerxe non só unha urbe senón tamén unha maneira propia de facer e mesmo de sentir. Por iso, esta edición quere render tributo tamén aos ferroláns e ferrolás que co seu facer conxunto fixeron posible o desenvolvemento do municipio.